لولوة .. راوية .. عمر

لولوة..

طالبة في الجامعة، هادية، خجولة، مقبولة الشكل، تحب تشارك في أنشطة مختلفة بالجامعة و معجبة بعمر.

راوية..

صديقة لولوة وتدرس معاها بنفس الجامعة لكن التخصص يختلف، خجولة وهادية جداً، مقبولة الشكل ومعجبة بعمر أيضاً.

عمر..

طالب بنفس الجامعة ومع لولوة بنفس التخصص، جميل، رزين، خجول إلى حد ما، غامض، طموحه كبير وعنده هدف يبي يوصله.





راوية شافت عمر صدفة يوم من الأيام بالجامعة
لفت انتباهها عيونه، بالشمس لونها يعكس على رمادي
بالظل لونها عسلي
سرحت بعيونه شوي
ومن يومها وهي تفكر فيه وبعيونه الفتانة (حلوة فتانة)
كل يوم يمر يزيد إعجابها فيه وبشخصيته وبعيونه اللي كل ما تشوفهم تدخل بعالم ثاني
عالم ما تقدر توصفه من جماله
كل اللي كانت تقدر تسويه إنها تشوفه بالجامعة وبس
لا كلام، لا سلام، ولا أي شي ثاني
راوية بنت عايلة ومتربية وبالنسبة لها عيب إن البنت تكلم أي ريال غريب حتى لو معاها بالجامعة مهما كان يضل غريب



لولوة صديقة راوية تعرف عمر بحكم زمالة مسبقة لأنهم بنفس التخصص ودايماً يسلمون على بعض
راوية تغار، مادري ليش بس تغار
لولوة كل يوم تسولف عن عمر وشلون اهو جميل وشخصيته مميزة
وكان واضح على لولوة إنها معجبة بعمر
لولوة على نياتها واللي بقلبها على لسانها
راوية كانت تخفي مشاعرها وتضحك
بس من داخل النار تكويها



عمر طالب متميز
من خلال مراقبة راوية له اكتشفت إنه ما يطوف ولا محاظرة ودايماً موجود قبل الوقت وملتزم بكل شي تقريباُ
إلا إذا حاشه ظرف لا سمح الله
بما إن راوية تراقب عمر وتعرف أماكن محاظراته وأوقاتها كانت تحرص على إنها تشوفه كل يوم
عمر لاحظ هالشي وصار في رد فعل
كل ما تمر راوية عمر يخزها ومرات يبتسم
يمكن إعجاب، يمكن عادي حالها حال الناس
عمر غامض واللي ما يعرفه ما يدري اهو شنو فيه أو شنو يبي
راوية ما كانت تدري إذا عمر يبادلها نفس الشعور ولا لأ



مرت شهور، أسابيع، أيام
راوية كل يوم تقول: أنا لازم أنسى عمر وأشيله من بالي، إذا اهو من نصيبي راح أتزوجه
وكل ما تقول هالجملة تصير أقوى وأقوى
بس عمر
عيونه، نظراته، تخليها أضعف إنسانة بالدنيا وتنسى كل الكلام وتدخل بالعالم الثاني
العالم اللي محتويها اهي وعمر




لولوة راح تضل تسولف مع راوية عن عمر بحكم انها تشوفه كل يوم
راوية بتموت من الغيرة وماراح تقول حق لولوة عن عمر
وبتستمر معاناة راوية بسبب عمر ولولوة



بالنهاية راوية تبي تهدي عمر هالأبيات من قصيدة بعتذر للشاعر بدر بن عبدالمحسن:


"تصدقي..
ما اخترت أنا أحبك..
محد يحب اللي يبيه.."